CHARACHAM
Phelong Phumling ga Singku phung khaijiu Jengdiu mimai dung
TASIIKY LINGSUBO
British government niu 1945 kum Phelong nam leng Lower Primary School piwang khai ye. Sibo ariak ki ga katipou leng Wisuangbou Thaluanmai piu tu langwang ye. Chiu bam tadi, anam mai niu ariakki (school) setu mase mak mibo jeng niu, Namtiram mai kating, (L) I.D. Huchapbou niu anam mai kating dung khuga maniu lujiu Namtiram lam lutad mi ye. Chiujiu Phelong LP School chiu kubam bo gasu, Namtiram LP School chiu ku khai lan mide.
Haibosai, Namtiram Baptist Church niu Mission School aram Phelong ga lang khang jiu, N.D. Khangchiubui khatdi N.D. Lungsurai panai tu katipou (Teacher) leng lang khai jiu pawan khat phung khai ye. Khatdi Ditalakbou Newmai tu Namtiram Mission School gu katipou (Teacher) leng Namtiram Baptist Church niu pawan khat makuat khai ye. Mission School wangbo sai Maiduanngamang R. Pamai tu Private school gu katipou leng lang khai ye khatdi D. Ajengbou, Namtiram niu di pawan khat kati khai ye.
Phelong nam ga government school affiliate thiubo habo jeng gasu 1957 kum Hulang, Katangmaipiu niu AANGG phung bambo wan ga “Aimol Constituency Assembly” (Current-52 Tamei ST AC) gasu D. Athuibou niu MLA phung bam bo ting Phelong Nam ga school khaira leng pakhu ga kheng ye. Sibosai suijiu, Phelong nam leng Lower Primary School khatdi Hindi Primary Shcool pi khai de. Sichiujiu Phungsangngam Tangkhul, Khundung nam Ukhrul District ganiu LP school khatdi Hindi school gu katipou leng 1958 kum lang wang khai de. Khatdi, sibo sai Primary School se upgrade thiu khang jiu tuhoi bambo UJB school se palunlung thiu jiu tad bam-e.
PHELONG NAM GU CHABANG CHAM
Phelong mai hai “Makhiang Guang Phungning Makuiluangdi “gasu Ntu, Nagaland ga lung khai ye. Sigasu, Konphung ga pawan khat lung khai lujiu Phelong nam Thom ra leng khatdi kadih charam phiu kum bo ting ga kadih charam maruangbo bam “CHAPHELUANG” bambo doulujiu sibo chapheluang se bi masan/madu patjiu anam thom khai de. Sigasu anam zan leng kusam khai jiu, Pheluang (Phelong) chiu ku mi bode. Pheluang nam hai chakin keng jiu lung khai mi bam sune, chiudi, rou masan khaibo ariak/chalad/chalui habo duan niu masuang lam gu racham (Old History) sera masan jiu din si lulak mide. Anam thom khai jiu lung bam bo wan ga Kathiu-Chari kengbo jeng niu anam tu hathon khai ye. ken sanra haiga nim khailo..
PHELONG BAPTIST PHUMLING - POST 1994
Aram Phelong hai 1994 kum namsan thiu tam tad mibo sai Phelong nguang Baptist church hai kalek kariu-za-chania (17) khatdi namsan lam kalek makai za chania (27) ronna lung bam niu ye. Chiudi Tingwang lungsa pein gasu tuhoi ra nam guang ga kalek samriu-za-mangiu (35) khatdi namsan lam kalek atai za charuk (46) lung khang lan jiu bam-e. Chiujiu Jengtung 22/04/2001 bonai Upper Phelong Baptist gu Church Building se dedication kam khai de. Phelong nguang Baptist Church niu Upper Phelong Baptist Church tu Mother church thiu jiu takum 1994 – 2005 katang phung khai ye. Paliutu Mondaily Church thiujiu Tingwang ngam kam raleng Jengtung 04/02/2004 bonai TR. Maraikambou tu Incharge Pastor ngam pi phung khai ye. Sichiujiu bam ga Full Fledge Church thiu mi ra leng K. Disibou, Pastor, Taningjam Baptist Church niu Jengtung 25/01/2009 bonai declare kam khai majut jiu TR. Maraikambou tu di Confirmed Pastor tien pi khai de. Thanai katangbo TR. Maraikambou niu Upper Phelong Baptist Phumling gu Pastor ngam kam jiu bam-e. Phelong Guang Baptist Church ga (L) Kaihiamling Newmai niu takum 1977 – 2002 katang pastor ngam kam khai ye. Sibosai Kaisingamang Newmai niu tuhoi katang bo Phumling gu Pastor thiujiu bam-e. Haibo Phumling kania tu katam tambo department lam niu di nkha khai jiu khatdi phumlingmai dung niu di Tingwang tien ga paliu lung ngut jiu changam kam bam bijiu Phumling nia se wisan khang bam ye.
Chameng dung
