Phelong nam ga kawicham wangbo
1902 kum niu nathubo gu kiluang-gut (Last Resettlement) thiu ngut jiu anam thom khai lan bo tang takum samriu san (30 +) damkhaibo piu Tingwang tu simakjiu tasing-tatu, rasa dung tu palui ra thiujiu lung khang mi bo ye. Katam-tambo racheng tad ra din wang bam tadi sui khai mak jiu bambo anam (Village) thiu bam niu ye. Chiujiu pawan katheng anam thiu khang jiu Pui-Piu cheng riak ga lung bam ga Maisiging Newmai niu kawicham (Gospel) dinwang rai lang khai de. Sibosai watheng mak ga 1940 kum niu Gironang Riamai tu Matekbou (Pariwangbou) Pamai, evangelist niu pi Christian (convert) thiu khai de. Gironang khat di panou-pana maidung niu Christian thiu mibo jeng gasu anam kating dung niu kiluang ga lung sui mak ye chiujiu kareng hang lam hapat khai jiu kareng hang lam chaki thiu lujiu lung khai de. Paniu Christian thiu mijiu patu ngou khailak bamdi, pase nnien ting ga (Noon time) kalek kalek ga tad jiu kakheng (Pray) thiu jiu bam-e chiu din ye. Paniu kareng hang ga takum khat lung jiu bam wan bo ga British Government niu kareng hang (bangla chek) ga rest-camp thiu khai bijiu sibo rest-camp tu inkhuanbo piu, Khulien (caretaker) tuse papam leng thiujiu siga lung tad mide. Chiujiu paniu kakheng thiujiu bambo se Rapiu Tingwang niu npou kak khai jiu aram Phelong maina niu khang khat, khang khat thiu jiu Christian thiu pat karein de.
Sibo tang ga, Thuanping Newmai, Kabaikamang Newmai, Sangmanliu Newmai, Dinluithuiyang Pamai khatdi kaisongjinnang Newmai chiujiu paliu di Christian thiu pat lan de. Sibo wan (1944 AD) ga World War II se loi kum jiu (Japanese army defeated by the allied British army) Japanese army dung niu chariu ju mijiu paliu gu chari mania (weapon) se aliu Zeliangrong mai dih ga khai diak Karen de. Sichiubo cham British government niu sibo ting ga Japanese army gu chari mania khum madui wang ra order patde, chiudi sise wang tang mak bo jeng niu British ki niu Zeliangrong mai tu kam chariu sude. Sibo tingga M.E.A Young niu Tamenglong gu S.D.O. phung bam liu ye, chiujiu Zeliangrong dih ga kabuak kabekbo pat jiu bambo ting ga pawan khat leng Tamenglong North-West Division gu Administration records dung se aram Phelong Inspection Bungalow ga phungwang jiu changam kam khai ye. (Haise British ki gu reconnaissance Plane Thiulon ga crash thiubo wan ga ye). Sibojeng niu Bangla-Chek ga Christian thiupat rai mai dung niu lung bam liu bo se sifaimai (soldiers) dung tad pat tad gut jiu bambo ga paliu se (Christian thiu pat rai mai dung) bam wi mak ye chiujiu tuhoi lung bambo Phungsan-Khuntuang ga chaki mania phung khang jiu lung khai de. Haibo khuntuang Namsan ga kalek chania/tachat (7/8) lung wang tang bowan ga puipiu cheng thin mai katingmai dung niu ngou ni mak jiu Christian thiu sui mak ye chiujiu kham bo duan niu Tamenglong SDO (Sub-Divisional Officer) khuga ladzan thiu ra wang de. Siga, SDO niu din ye, “paniu, paniu kahum nibo cheng riak tad bam sui ye, mai khat tu di hai kumbo kham sui mak ye” chiu ladzan thiu khai de. Chiujiu Christian thiu pat mimai dung, paliu niu ladzan ngam lubo setu chunwibo nai paliu gu malumbo se nkiu khang jiu khang khat, khang khat thiujiu christian thiu pat karian de. Sibo sai ra mai niu di kham bo thiu lan mak jiu Tingwang gu wi se luni jiu pasin parin thiujiu christian thiu pat phui de. Haibosai puipiu chengmai (Non-Christian) kiluang ga lungmai niu paki phung lung kali (shift to christian colony) bam mak ta di Christian thiu (Convert) ni mai hina niu paphung, paphung gasu Christian thiu sui de chiujiu 1979 kum niu senpat (declared) khai de. Mit, mit-jiu aram Phelong mai mathiu niu Christian thiu kam khai jiu Jengtung 15/04/1980 bonai Kenpatbo (Passover) gu changee thiu khai de.
