PHELONG NAM GU CHABANG CHAM
Phelong mai hai “Makhiang Guang Phungning Makuiluangdi “gasu Ntu, Nagaland ga lung khai ye. Sigasu, Konphung ga pawan khat lung khai lujiu Phelong nam Thom ra leng khatdi kadih charam phiu kum bo ting ga kadih charam maruangbo bam “CHAPHELUANG” bambo doulujiu sibo chapheluang se bi masan/madu patjiu anam thom khai de. Sigasu anam zan leng kusam khai jiu, Pheluang (Phelong) chiu ku mi bode. Pheluang nam hai chakin keng jiu lung khai mi bam sune, chiudi, rou masan khaibo ariak/chalad/chalui habo duan niu masuang lam gu racham (Old History) sera masan jiu din si lulak mide. Anam thom khai jiu lung bam bo wan ga Kathiu-Chari kengbo jeng niu anam tu hathon khai ye. “Khouri” gasu anam peng tad lu wangjiu anam thom khai lan ye. Sibotang di, “N-gah-ri” (Angami) niu tan wang lanboga anam hai peng lande, chiujiu anam se hami de. Sibosa, pating theng tad mibo tang niu Taningjam kakzam ga lung wang lanjiu bam ga Apou Wanjengjinang Newmai niu mazang jiu katingmai lung raibo Siuningram kanabo ga pawan khat lung khai de. Watheng makjiu Wanjengjinang Newmai niu sai mijiu Taningjam Kakzam ga lung kum lan de. (Taningjam Kakzam ga lung bam boting se aram Pheluang tu Taningjam Khunnou chiu ku bam niu ye) Chiujiu 1902 AD kum paluan sumbo (Third Resettlement) thiujiu anam thom ngut lan ra ga Apeh Namjuthiuliu Newmai niu panamaidung; Kaidietding Newmai, Thiusongwi Newmai khatdi Khangkiujinang Newmai paliu tu mazang lujiu anam thiu lan khe tiu jiu tuhoi lung bambo kiluang ga lung ngut de. (Sibosai niu aram Pheluang tu Phelong chiu ku mi bo ye)
Khangkiujinang Newmai niu khamtien lekhaijiu mathiuna tiuchang gihng khaibo setu majut jiu ngut de. Siga paliu pam thiujiu Kalunchuang Nchangta, khatdi Ngankhailang Pamai panai niudi nam thom nalang (Last resettlement) bo ga wang kajou khai ye. Sibo sai niu Songtalang Nchangta di Pou-Mek thiujiu aram Phelong ga wang lung ye. Sichiu lubosai Karijuanang Pamai niu di Diluang lam su Tingtong-Ri tan wang bijiu aram ga lung wang de. 1902 kum gasu anam thom khai lan jiu Pou-Peh chengriak gu nam-gut thiujiu ngut boga, Khangkiujinang Newmai niu Kabiu-Tam diang pat de, Thiusongwi Newmai niu kabiu tam katub kumbo piu thiu ye khatdi Malanridinang Newmai niu Chami malap pat khaide.
Phelongmai niu anam thiu lubosai “Chakiu-Kariu-Dungbo” chamrang ga Khangkiujinang Newmai niu raikachangbo thiujiu tien pat khai ye. (Pui-Piu chengriak ga Chakiu-Kariu-Dungbo hai paleng machanglakbo thiumakjiu, patek-pajou masang manang jiu khourui khouring paza machangjiu , papui-pareng, pasin-parin changjiu, paphi-paben lung-jeng chamjiu wahina nthui-nrui jiu lungmai niu thiubo tiendon ye).
