Paramba Lungdoubo Ringting
Tinglangwiliu Newmai
Chamai kakeng niu aliu ringting tu maning suk khai mak ge. Chamai kakeng hai paliu ringting tu paliu ronna kam masa jiu ringting gu paramba sikhai makjiu karing tadloi mimai kengjiu bamme. Drugs khatdi tiu-maniu sak-maniubo puat paja-paja thin-piujiu paliu ringting tu paliu ronna kam madun jiu bamme. khatdi mai khang sia maira makha-agabo lunlung ga lung bam mai keng bamme. Haikumbo lunlung ga lung bam maitu phui khai sai wajiu kha maning kam lakbo bamme. Aliu ringting haise delam su wang bo lo; sai, souniu aliu ringting pikhailo chiubo wadi maning tou makjiu lung mai keng jiu bamme.
Ih chalad maniu khai kanibo bamme, “agu-nagu ringting haise deleng jengniu lung bam lo chiubo maningtoubo bamma”? ‘Ringting’ chiubo haise paramba suk chang suk bo-e. Genesis 2:7 ga chiujiu rou khai ye, “siga Rapiu tingwang niu kadih gasu taniang khoilujiu chamaina tu palun damsude; chiujiu paniuki gase paniu karingbo siu mudkhai bijiu karingbo mai thiu mide.” Tingwang gu karingbo siu-e. Aliu gu karingting haise Tingwang niu aliu tu palun kum gap jiu dam khai-e (Gen.1:27). Sichiu sai aliu ringting hai dejiu khat paman kungbo gulo katiubo aliu niu sira pageng bamme. Tingwang niu aliu tu matha-ku jiu dam khai makge, chiudi pageng khat bamjiu dam khai-e. Chiusai deleng natu-atu dam khai gulo katiubo siraleng khatdi Tingwang niu machunbo se delo katiubo raija phiu ra pageng bamme. Tingwang tu sira pageng bamme chiusai aliu ringting haise pageng bambo lunlung ga lung khai rabo e.
Tuhoi kadihpiri disu mibo khatdi ningting nkiukhang mibo wan ga (Digital age) walam-walui makum khai simakjiui lungrabo pawan tamibo-e. Aliu niu phui mating khaibo ting ga, chabuanmai kakeng ra wadi maningtou-makumtou makjiu lung bam maitu di ngoupat jiu bamme. Jikiang sude,wangam di kam mak jiu tekiu de, sai tingmik marin mobile phome thin mara jing khai lan de, sai tamiu kum lanjiu jilande, haitiujiu tingmik machang pawan kam maha jiu bamme. Haisiniu ra aliu leng khatdi pui-piu leng kagengbo lunlung doulakge. Aliu puipiu tu phui dai khe, aliu leng jeng niu paliu ra maranjiu taten thiu bamme. Tingriu bidi tingcheng tan bidi chalu tad sou makjiu bamme khat di nai khat tingmik nadi paliu ra soukhai maja jiu taten tien bamme.
Aliu niu wa-ngam di kam mak jiu tingmik marin kajit zing-zing bam bose aliu wakhat nadi makum toubo doumak kha jiu ma? Aliu chabuanmai dung haikumbo lunlung ga lung bam kha sai aliu mik rak pat mak kha-e katiubo sira ye. Tuhoira hai kumbo lunlung ga lung bam rabo pawan tade, palam ra tuhoi aliu gu machun (Vision) bamjiu khatdi aliu niu wangrabo lam phuimeng ngoujiu karam matanjiu bamrabo pawan mibo-e. Aliu puipiu ga mangiu khaibo ronna makjiu aliu niu de ngam tien kasuibo bamlo chiubose phiura pathou-e. Nakykhun leng, maksai naleng wa-ngam nadi tienkhaira maning makjiu pageng kahah bo lunlung ga pawan kam mahajiu bam mi tulo. Kamsi bamdi kamsimak bamdi, tuhoi chakin gu nahmai dung ra tasi ningting kati kinmai maliang mibo ye. Tasiiky (School) tadlu jiu ariak tu ronna kati kinbo tu education chiu makge; walam hina ga agu ningting khatdi achun tu pijiu developed thiukhaijiu agu ngamkam ga madu khaibo setu education chiujiu kubo-e. Aliu niu tasii kati lujiu kiluang ga wangbo ting ga aliu kyleng bidi, charuang leng bidi taten thiu kasuibo hai kengjiu bamme, sise aliu tien bam ma? Taten thiubo ronna makjiu aliu niu tien simak bose tien si khai nibo lungchun pat ma pat mak lo? Npuima khatdi npiumai niu kiluang gasu kati kasuibo khatdi tien kasuibo kengjiu bamme. Tek-chagan alangbo sera mathiu niu tien kasuibo ye, chiudi npuimai niu tien kajibo, maksai npiumai niu tien kajibo palang tam-tamjiu bamme. Riliumai dung niu chaphai-chalang tamten thiusi bamma? Tasiu ngemsi kachangsi bamma? Sai, rikhangmai dung niu chaheng-mun kariu sibam ma? Chariang liamsi bamma? Marui-rek thiusi bamma? Kasiamai ra haikumbo ngam poi-poina ra thiusi bam sune, chiudi Ihniu dinkhainibo sera, ngann boga tasiinah dung niu haikumbo ngam dung hai thiusi-tiensi radi karam ra pageng bambo ye. Sanjiu dinkhainibo lam sera aliu tasii ningting kati mai khat thiujiu kiluang ga wang sai wangam di kam mak jiu matha bam mitulo, paniu paniu tien kasui bo tense tien jiu bam khe.
Palam niabo ga phuilan sai, tasii ningting kati bam bose aliu degu jaiga kati bamlo? Kati bose pajan naleng kati maidi keng bamme. Pajan naleng ra kati khai mi tulo, chiudi parasi masi raleng karam khe. Mairam maitu suipaijiu kati bam sai ra wadi kawi dou lulak ge, chiudi karambo nai aruiang jiu Tingwang khuga mangiu khaisai aliu ringting ga kawibo lungdou lurabo-e ( John 15:5 ) ga phuisai ngou sune.
Puipiu thiu maidung niu nahmai dung tu chamai pimui khai ra paliu gu kadibo ngiuduan bamme. Paliu nah gu chun-maning sikhai ra pageng bamme, khatdi paliu hai ndebo tun ga wilo katiubo di sira pageng bamme, sai, paliu tu phuijiu matanjiu makuat khaira pageng bamme. Paliu tu kachu khai bam khe khatdi paliu niu wa tenmou wangbo ting ga rukhai radi pageng bam sune. Haidung ruang gasu pageng bam thubo se kakheng thiubo si-ye, sou mak jiu kakheng thiu khaira pageng bamme. Aliu Christian maileng ra kakheng thiubo seniu dithubo chari puan thiujiu bambo-e. Nahmai niu nalad piu makjiu lung bamsai kakheng thiu khai bilo, alung pang patjiu, mikdui patjiu kheng khai mibo rathoi ra wadou di matha tami lakge, Tingwang niu naikhatra parasi masi khai birabo-e.
Aliu gu ringting haise paramba phiudoujiu lung matun nei sai, rai kachang boga Tingwang tu sira ye ( Matthew 6:33), sichiusai naringting ga paphan khat sera kawibo lungdou mibo de. Nangniu tienbo hina ga chamchang jiu mainiu malum buibo ga taten tienlo khatdi nalungchung sing gasu tien khai bilo. Kanambo ga maningtou khaibo niusai, nachun gutbo (your interest) ga tad suk gut khailo sichiusai naringting ga nangniu maning bo hina se wang tathui rabo-e.
Haise agu kadunbo karoucham arammai leng makum-khaibo ye, ken khaimai mathiu riga Tingwang niu thoi khaibo thiulo!
